ಇಂಚರ

ಪಕ್ಷಿಗಳ ಇಂಚರದಿ ಆಹ್ಲಾದಗೊಂಡು ರವಿ
ರಭಸದಿಂದೇರುವನು ಪೂರ್ವ ನಭದಿಂದ |
ಚರಾಚರ ಜೀವ ಕುಲ ಹುರುಪಿನಿಂ ಬೆಳಗುವುದು
ಇಂಚರದ ಚಲನೆಯಿರೆ ಜಗವೆಲ್ಲ ಅಂದ ||

ನೂಪುರದ ನರ್ತನವು ರಸಿಕತೆಯ ತುಂಬುವುದು
ಅಪ್ಸರೆಯ ನೆನಹಿನಲಿ ಕಾಣುವುದು ನಾಕ |
ಸಪ್ತಸ್ವರ ಹೊರಡಿಸುವ ಶಾರದೆಯ ವೀಣೆಯಿಂ
ಸಾರ್ಥಕ್ಯ ಭಾವ ಹೊಂದುವ ಮನುಜ ಲೋಕ ||

ಪಾಂಚಜನ್ಯದ ನಾದ ಠೇಂಕಾರದಿಂ ಅಂದು
ಸದ್ಧರ್ಮ ಜಯಿಸಿತ್ತು; ತೊಲಗಿ ಭೂಭಾರ |
ವಿಹಗಗಳ ಇಂಚರವು ಸುಶ್ರಾವ್ಯವೆನಿಸುವುದು
'ಶ್ರವ'ವನೂ ಬೀಳಿಪುದು ಅನಿವಾರ್ಯವಾಗೆ! ||

ಆಸಕ್ತ ಕಿವಿಯಿರಲು ಚಿಲಿಪಿಲಿಯೂ ಚೆಂದ!
ಕಾಳೊಂದ ಕಂಡ ಬಲು ಖಗಗಳುನ್ಮಾದ |
ಕಲರವವು ಮೂಡುವುದು ಕೂಡಿ ನಡೆದಾಗ
ಇಂಚಿಂಚು ಜೀವನದಿ ಕಾಣುವೆವು ಮೋದ ||

ನನ್ನ ಹಾಡು

ನನ್ನ ದಾರಿ ನನಗೆ ಎಂದು ಗಡಿಯ ತೊಡೆದು ಹೊರಟೆನು
ಕಿರಿದಾರಿಯ ಕ್ರಮಿಸಿ ಹೆದ್ದಾರಿಯನ್ನು ತುಳಿದೆನು
ಒಬ್ಬಂಟಿಯು ನಾನು ಎಂಬ ಕಟು ಸತ್ಯವ ಮರೆಯಲು
'ಸ್ಪಷ್ಟ ಗುರಿಯ ಪಥಿಕಗೆಂದೂ ಪಥವೇ ಸಾಥಿ' ಎಂದೆನು
ದಾರಿಯಲ್ಲಿ ಸಾಗುತಿದ್ದ ಮಂದಿಯನ್ನು ನೋಡುತ
ಹಿಂದಿಕ್ಕುವ ತವಕದಲ್ಲಿ ಗುರಿಯ ಕಳೆದುಕೊಂಡೆನು
ಕ್ರಮಿಸಿ ಬಂದ ದಾರಿ ನೋಡಿ 'ನನ್ನದಲ್ಲ'ವೆನಿಸಲು
ಸದಾ ಮೌನಿ ನನ್ನ ಮನಸು ಮಾತನಾಡತೊಡಗಿತು :-

"ಗುರಿಯು ಒಂದು ದಿಗಂತವು; ಪಥವದತಿ ಅನಂತವು
ದಾರಿಗುಂಟ ಗುರುವಿದ್ದರೆ ಗುರಿಯು ಬರಿ ನಿತಾಂತವು
ಪಥಿಕ ಮಂದಿ ಗೆಳೆತನವದು ಬಹು ಶಕ್ತಿಯ
ಕೊಡುವುದು
ಕ್ರಮಿಸಿದಂತೆ ಕಠಿಣ ದಾರಿ ತಲ್ಪ-ಲತೆಗಳೆನಿಪವು"

-ಇದನೆ ನಂಬಿ ಸಾಗುತಿಹೆನು ಇಂದೂ ನಾನು ಗೆಳೆಯರೇ!
ಆತ್ಮಸ್ಥೈರ್ಯ, ಸ್ವಂತ ದೃಷ್ಟಿ, ಸದ್ಭಾವದಿಂದ. ಜೊತೆಗೆ,
ನಡಿಗೆ ವೇಗ ವರ್ಧಿಸುತ್ತ ಬಲು ದೂರವ ಕ್ರಮಿಸುವೆ
ಹೆಜ್ಜೆ ಗುರುತು ಅಳಿಯೋ ಮೊದಲು ಹೊಸಹೆಜ್ಜೆಯನಿಕ್ಕುವೆ